Dövlətimizin başçısı İlham Əliyev bu günlərdə İtaliyaya uğurlu nəticələlərlə yadda qalan işgüzar səfər edib. Uzun illər ərzində Azərbaycan və İtaliya strateji tərəfdaşlar kimi fəaliyyət göstərirlər. Müvafiq Bəyannamə təqribən 10 il əvvəl qəbul edilib. Əməkdaşlığımız bir çox sahəni əhatə edir. Yüksək səviyyəli təmaslar yaxın siyasi tərəfdaş olduğumuzu nümayiş etdirir.
Səfər çərçivəsində Prezident İlham Əliyev “Dünya, Avropa və İtaliya haqqında bilgilər” mövzusuna həsr olunmuş Beynəlxalq Çernobbio Forumunda “Yeni geosiyasi şəraitdə Azərbaycanın rolu” adlı sessiyada çıxış edərək bütün bu məqamlara aydınlıq gətirib.
Hər bir səfər Azərbaycanın artan nüfuzunun, cənab İlham Əliyevə yüksək etimadın göstəricisidir. Tarixi zəfərlərimizdən, ərazi bütövlüyümüzün və suverenliyimizin bərqərar olunmasından sonra Azərbaycanın beynəlxalq münasibətlər sistemində mövqeyinin daha da möhkəmlənməsi diqqətdən kənarda qalmır. Bunu həm qarşılıqlı səfərlər, həm də ölkəmizin ev sahibliyi etdiyi, eyni zamanda, cənab İlham Əliyevin fəxri qonaq qismində qatıldığı tədbirlərin say tərkibi təsdiqləyir. Hazırda bu reallıq da beynəlxalq səviyyədə etiraf edilir ki, tədbirlərin hansı məkanda keçirilməsindən asılı olmayaraq əsas diqqət Azərbaycana yönəldilir. Bu baxımdan dövlətimizin başçısı İlham Əliyevin Beynəlxalq Çernobbio Forumunda iştirakı, sessiyada çıxışı xüsusi diqqətlə izlənildi. Prezident İlham Əliyev çıxışında ölkəmizin iqtisadi imkanlarından bəhs etməklə yanaşı, əsas diqqəti tarixi Zədərimizə, suverenliyimizin tam bərpa edilməsinə yönəltdi. Vurğulandı ki, İtaliya Azərbaycanın dünyada bir nömrəli ticarət tərəfdaşıdır. Ötən il ticarət dövriyyəmiz 16 milyard dollara yaxın olub. Artım üçün potensialı yalnız enerji sektorunda deyil, digər sahələrdə də görürük. Azərbaycan İtaliyanın bir nömrəli neft və ikinci ən böyük qaz təchizatçısıdır. Bu da əməkdaşlığımızın vacib hissəsidir. Bu gün enerji təchizatı onu aydın şəkildə nümayiş etdirir ki, enerji təhlükəsizliyi milli təhlükəsizliyin ayrılmaz parçasıdır. Azərbaycandan İtaliyayadək uzanan, Cənub Qaz Dəhlizi adlanan 3500 kilometrlik inteqrasiya edilmiş boru kəməri sistemi bu gün 10 ölkənin enerji təhlükəsizliyini təmin edir. Hazırda 10 ölkə Azərbaycandan qaz alır və onlardan 7-si Avropa İttifaqının üzvüdür. Bu səbəbdən Avropa Komissiyası Azərbaycanı ümum-Avropa qaz təchizatçısı və etibarlı tərəfdaş adlandırır.
“Təkcə Qafqazda deyil, daha geniş regionda baş vermiş ən böyük geosiyasi dəyişiklik Azərbaycanın ərazi bütövlüyünün və suverenliyinin bərpası oldu”, – söyləyən dövlət başçımızın sözlərinə görə, beynəlxalq hüququn aliliyi o zaman təmin edilə bilər ki, burada hüquqi çərçivə ilə yanaşı, həmçinin cəsarət və real güc də var. İşğal altında olan ərazilərimizin böyük hissəsi 2020-ci ildə 44 günlük Vətən müharibəsi nəticəsində azad edildi. Lakin məsələ bununla bitmədi, çünki separatçılar Azərbaycanın suverenliyinə xələl gətirməyə davam edirdilər. Bu məsələdə sonuncu nöqtə ötən ilin sentyabrında qoyuldu və Azərbaycanın suverenliyi tam şəkildə bərpa edildi. Münaqişəyə nəhayət son qoyuldu və bu, məhz belə də olmalı idi: “Bu, bu gün ərazi bütövlüyünü və suverenliyini bərpa etmək istiqamətində uğura nail olmaqda çətinlik çəkən bir çox ölkə üçün yaxşı nümunədir. Azərbaycan öz nümunəsi ilə onu nümayiş etdirdi ki, beynəlxalq hüquq, güclü siyasi iradə, cəmiyyətin səfərbər olması və fiziki güc ciddi siyasi dəyişikliklə nəticələnə bilər”.
Bu gün əsas müzakirə mövzularından biri də Azərbaycanın noyabr ayında ev sahibliyi edəcəyi COP29-dur. Bu mötəbər tədbirin ölkəmizdə keçirilməsi Azərbaycanın hər bir sahədə zəngin təcrübəyə malik olmasının, beynəlxalq həmrəyliyin gücləndirilməsinə verdiyi töhfələrin, ümumiləşdirilmiş şəkildə qeyd etsək beynəlxalq nüfuzunun göstəricisidir. Qlobal məsələlərin həllində ölkəmizin mövqeyinə verilən önəm ədalətə və beynəlxalq hüquqa söykənən siyasətimizin təqdimatıdır. Cənab İlham Əliyev sözügedən çıxışında diqqəti COP29-a yönəldərək bildirdi ki, bununla bağlı qərar ötən ilin dekabrında verildi və hazırlıq üçün bir ildən az vaxtımız var idi. Burada ən vacib məqam ondan ibarətdir ki, bu qərar 200-ə yaxın ölkə arasında konsensusa əsaslanırdı. Biz bunu Azərbaycana olan ehtiramın təzahürü hesab edirik. Tarixdə ilk dəfə COP bizim regionumuzda keçiriləcək. Azərbaycan qlobal arenada müxtəlif aktorlar arasında körpülərin qurulması üzərində fəal çalışır. İqlim mövzusu ölkələri və xalqları ayıran bir mövzudur. Qarşılıqlı iddialar və ittihamlar var. Kim planetimizə xələl gətirməkdə daha çox günahkardır, kim daha çox ödəməlidir və sair. Yəni, beynəlxalq arenada qlobal aktor olmasaq belə, zənnimcə qlobal Cənub və qlobal Şimal arasında körpülərin qurulması mümkündür.
Dövlətimizin başçısı İlham Əliyev Avropa İttifaqının 10 üzvünün rəsmi olaraq Azərbaycanın strateji tərəfdaşı olduğunu, 120 ölkəni birləşdirən Qoşulmama Hərəkatına 4 il sədrliyimizi önə çəkərək belə bir əminliyi ifadə etdi ki, Azərbaycan yaxşı nəticə hasil edə biləcək ölkədir.
Beləliklə, qədim tarixə malik olan Azərbaycan-İtaliya əlaqələrinin bundan sonra da yüksələn xətlə inkişafı üçün imkanlar mövcuddur. Bu əlaqələr xalqlarımızın, dövlətlərimizin bir-birinə yaxınlaşmasında əhəmiyyətli rol oynayır. Azərbaycan-İtaliya münasibətləri hazırda yeni inkişaf mərhələsini yaşayır. Strateji tərəfdaşlığa əsaslanan əlaqələrin möhkəmlənməsi üçün yol xəritəsi təqdim edilib.
Elmar Əhmədov,
Yeni Azərbaycan Partiyası Salyan rayon təşkilatının sədri
