Müstəqillik illərində Azərbaycan Respublikasının xarici siyasətinin əsas istiqamətlərindən biri regional əməkdaşlığın gücləndirilməsi, qarşılıqlı faydalı iqtisadi, siyasi və mədəni əlaqələrin inkişaf etdirilməsidir. Bu baxımdan Müstəqil Dövlətlər Birliyi (MDB) Azərbaycan üçün çoxşaxəli əməkdaşlıq müstəvisi kimi çıxış edir. MDB çərçivəsində qarşılıqlı anlaşma, iqtisadi inteqrasiya, mədəni irsin qorunması və humanitar sahədə əməkdaşlıq ölkələr arasında birliyin möhkəmlənməsində mühüm rol oynayır.
Azərbaycan 1993-cü ildən etibarən MDB-yə üzv olaraq bu təşkilatın siyasi, iqtisadi və humanitar fəaliyyətində fəal iştirak edir. Ölkəmiz regional təhlükəsizlik, nəqliyyat-kommunikasiya, enerji inteqrasiyası və mədəni əməkdaşlıq istiqamətlərində ardıcıl addımlar ataraq birliyin ümumi məqsədlərinə töhfə verir. MDB çərçivəsində qəbul edilən qərarlarda Azərbaycanın mövqeyi həmişə qarşılıqlı hörmət və əməkdaşlıq prinsiplərinə əsaslanır. Bu münasibətlər həm də regionda sabitliyin, mehriban qonşuluq və etimad mühitinin qorunmasına xidmət edir.
Bu istiqamətdə 2025-ci il oktyabrın 10-da Tacikistanın paytaxtı Düşənbədə keçirilən MDB Dövlət Başçıları Şurasının məhdud tərkibdə iclası mühüm hadisə oldu. Görüşdə birliyin gələcək fəaliyyət istiqamətləri, iqtisadi əlaqələrin dərinləşdirilməsi, mədəni-humanitar sahədə əməkdaşlığın genişləndirilməsi kimi məsələlər müzakirə edildi. Tədbir həm də region dövlətləri arasında dostluq və qarşılıqlı anlaşma ruhunun daha da möhkəmlənməsi baxımından əhəmiyyət daşıyırdı.
Azərbaycan Respublikasının Prezidenti İlham Əliyev iclasda çıxışı zamanı MDB məkanında səmimi və praqmatik əməkdaşlıq mühitinin qorunmasının vacibliyini vurğuladı. Dövlət başçısı bildirdi ki, Azərbaycanın təşəbbüsləri regionda sabitliyin və inkişafın təmin olunmasına yönəlib. Prezident İlham Əliyev həmçinin qeyd etdi ki, birliyin üzv dövlətləri arasında mədəni və humanitar əlaqələrin inkişafı xalqların yaxınlaşmasına, dostluq bağlarının möhkəmlənməsinə xidmət edir.
Cənab Prezidentin çıxışı zamanı səsləndirdiyi mühüm fikirlərdən biri isə Azərbaycanın Şərqi Zəngəzur bölgəsinin Laçın şəhəri ilə bağlı idi. Dövlət başçısı dedi: “Azərbaycanın Şərqi Zəngəzur bölgəsinin Laçın şəhərinin bu il MDB-nin mədəniyyət paytaxtı kimi namizədliyini dəstəklədiklərinə görə MDB dövlət başçılarına təşəkkürümü bildirirəm.” Bu fikirdə həm minnətdarlıq, həm də dərin məna var. Laçının MDB-nin mədəniyyət paytaxtı seçilməsi yalnız mədəni hadisə deyil, həm də Azərbaycanın azad edilmiş ərazilərində həyata keçirdiyi genişmiqyaslı bərpa və dirçəliş prosesinin beynəlxalq səviyyədə tanınmasının göstəricisidir.
Uzun illər işğal altında qalmış Laçın bu gün tamamilə yenidən qurulur. Yeni infrastruktur, müasir yaşayış binaları, sosial və mədəni obyektlər şəhərin həyatına yeni nəfəs gətirir. Laçının MDB mədəniyyət paytaxtı statusu onun zəngin tarixi, qədim mədəni irsi və multikultural dəyərlərinin bütün postsovet məkanında tanıdılmasına şərait yaradacaq. Bu qərar eyni zamanda MDB dövlətlərinin Azərbaycanın sülh quruculuğu siyasətinə, Qarabağ və Şərqi Zəngəzurda həyata keçirilən yenidənqurma proseslərinə göstərdiyi mənəvi dəstəyin təzahürüdür.
Beləliklə, Düşənbədə keçirilən MDB Dövlət Başçıları Şurasının iclası bir daha sübut etdi ki, Azərbaycan regionda əməkdaşlığın və sabitliyin əsas dayaqlarından biridir. Prezident İlham Əliyevin çıxışı bu reallığı bir daha təsdiqlədi və Azərbaycanın beynəlxalq münasibətlər sistemində etibarlı tərəfdaş, sülh və inkişafın təşəbbüskarı olduğunu nümayiş etdirdi. Laçının MDB-nin mədəniyyət paytaxtı kimi tanınması isə təkcə Azərbaycanın deyil, bütün regionun mədəni və humanitar inteqrasiyasına verilmiş böyük töhfə kimi tarixə düşdü.
Vüqar Ağayev
YAP Salyan rayon təşkilatının məsləhətçisi
