Səmil Şahlaroğlunun qələmindən
Sənət dünyasında elə insanlar var ki, onların hekayəsi bir filmin süjet xətti qədər təsirli və düşündürücüdür. Bu insanlar talelərinin sərt üzünə rəğmən, heç vaxt sınmırlar, əksinə, içlərindəki yanğını sənətə çevirərək dünyaya yeni əsərlər bəxş edirlər. Belə insanlardan biri də mənim dəyərli dostum, istedadlı kino rejissoru və Salyan Dövlət Rəsm Qalereyasının direktoru Kürçaylı Məmmədovdur.
Onun həyatı asan olmayıb. Keçdiyi yollar, qarşılaşdığı maneələr, içində daşıdığı ağrılar hər bir insana ağır gələ bilərdi. Amma o, ruhdan düşməyib, əksinə, hər çətinlikdən güc alaraq irəliləyib. O, həyatın sərt üzünü erkən yaşlarından görüb, lakin buna baxmayaraq, qürurla, əyilmədən yoluna davam edib. Onun həyat yoluna baxdıqda, mən həmişə qəlbimdə bir düşüncə keçirirəm: “Böyük insanlar böyük əzabların içindən doğulur.”
Sənətə və Sənətkarlığa Gedən Yollar
Kürçaylı Məmmədov kino sənətində öz sözünü deməyə çalışan rejissorlardandır. O, sadəcə kamera arxasında dayanan bir insan deyil, insan ruhunun dərinliklərini ekrana gətirməyə çalışan bir sənətkardır. Onun çəkdiyi hər kadr, qurduğu hər süjet xətti tamaşaçının qəlbinə toxunur, düşündürür, bəzən kədər, bəzən isə ümid aşılayır. O, sadəcə rejissor deyil, həm də öz sənətini sevən, onu incəliklərinə qədər bilən bir ustaddır.
Kürçaylı Məmmədov Azərbaycan Dövlət Mədəniyyət və İncəsənət Universitetinin bakalavriat (rejissorluq, televiziya rejissoru) və magistratura (kino rejissoru) pillələrini bitirib. O, təhsil aldığı illərdə Xalq artisti, kinorejissor Vaqif Mustafayev, Əməkdar incəsənət xadimi, kinorejissor, Azərbaycan Dövlət Film Fondunun direktoru Cəmil Quliyev, Xalq artisti, kino və teatr aktyoru Pərviz Məmmədrzayev, rejissor, aktyor Rövşən İsax, aktyor, bədii qiraətçi Nadir Hüseynov, Əməkdar mədəniyyət işçisi, televiziya film və tamaşaları rəssamı Rafael Əsədov və bir çox görkəmli sənət adamının tələbəsi olub, onlardan sənətin incəliklərini öyrənib.
Təhsil illərində öyrəndiklərini praktikaya tətbiq edən Kürçaylı Məmmədov müxtəlif qısametrajlı bədii və sənədli filmlərin, etüdlərin və televiziya verilişlərinin müəllifi və rejissorudur.
Uğurlar və Nailiyyətlər
Onun rejissoru olduğu “Bərə” qısametrajlı filmi 10-cu Bakı Beynəlxalq Qısa Filmlər Festivalında “Münsiflər heyətinin diplomu”na layiq görülüb.Digər sənədli filmi “Sabahın xeyir, Sübh anası” isə 14-cü Bakı Beynəlxalq Qısa Filmlər Festivalında “Ən yaxşı sənədli film” nominasiyasında qalib gələrək baş mükafat – “Qızıl nar” ilə təltif edilib.
Bundan başqa, “Dağlardakı Qarxun” sənədli filmi Türkiyədə keçirilən 5-ci Türk Dünyası Belgesel Film Festivalının laureatı adını qazanıb.Bu uğurlar onun sənətə və peşəsinə olan sonsuz sevgisinin, zəhmətinin və istedadının bir göstəricisidir.
Mədəniyyət Sahəsində Fəaliyyəti
Kino sənəti ilə yanaşı, Kürçaylı Məmmədov mədəniyyət sahəsində də aktiv fəaliyyət göstərir. O, hazırda Salyan Dövlət Rəsm Qalereyasının direktoru və Şirvan-Salyan Regional Mədəniyyət İdarəsinin kommunikasiya meneceri,həmçinin ARB televiziyasının müxbiri vəzifələrini icra edir. Bundan öncə isə Salyan rayon Mədəniyyət Mərkəzinin bədii rəhbəri vəzifəsində çalışıb.O, mədəniyyətin və incəsənətin inkişafına töhfə verməyə, gənc nəsilə sənətin sirlərini öyrətməyə, yeni layihələr həyata keçirməyə davam edir.
Dostumun Qəlbindəki Ağrılar
Onu tanıyandan bilirəm ki, Kürçaylı Məmmədovun qəlbi çox genişdir. O, təkcə istedadlı bir insan deyil, həm də paylaşmağı, öyrətməyi sevən bir müəllimdir. Hər zaman yanında olan insanlara dəstək olub, öz bildiyini bölüşüb. Amma bəzən elə insanlar var ki, nə qədər güclü olsalar da, gözlərindən oxunan bir hüzn var. Kürçaylı da belə insanlardandır.
Gözlərindəki kədəri bəzən görməmək mümkün olmur. O qədər mübarizə aparmış, o qədər maneələri aşmış bir insanın gözlərində kədərin izi var. Artıq qara telləri arasında ağ dənlər də görünməyə başlayıb. Bu, sadəcə yaşın gətirdiyi bir dəyişiklik deyil, bu, zamanın, çəkilən əziyyətlərin, həyata dair yaşanan nakamlıqların bir nişanəsidir. Bəlkə də bəzi insanlar dəyərini yetərincə bilməyib, bəlkə də arzularından bəziləri hələ reallaşmayıb.
Onun Haqq Etdiyi Zirvə
Mən Kürçaylı Məmmədovu həmişə ən yüksək zirvələrdə görmək istəmişəm. Çünki o, buna layiqdir! Onun kimi istedadlı, savadlı və işinə ürəkdən bağlı insanlar hər zaman layiq olduqları yerdə olmalıdırlar. Amma təəssüf ki, bəzən həyat ədalətli olmur. Bəzən elə insanlar yüksək mövqelərə çatır ki, həqiqi sənətkarlar onlara baxıb təəssüflənirlər.Lakin mən inanıram ki, haqq öz yerini tapacaq. Bir gün gələcək, mən dostumu elə bir yerdə görəcəyəm ki, onun gözlərindəki kədər sevincə çevriləcək. O gün mənim üçün də böyük bir qürur olacaq.
Həyatın çətin yollarında sınmayan, öz yolunu özü açan, sənəti ilə insanlara iz qoyan Kürçaylı Məmmədov, sən həqiqətən də ən uca zirvələrə layiqsən!Bu yazı mənim dostumun keçdiyi yolların kiçik bir əks-sədasıdır. Bəlkə də bir gün onun həyatı haqqında film çəkilər. O film elə öz həyat hekayəsi qədər təsirli və möhtəşəm olar. Mən isə sadəcə bir tamaşaçı kimi deyil, bir dost kimi həmişə onun yanında olacağam.
Çünki o, buna layiqdir!
