Kanada hakimiyyəti yaxın günlərdə Rusiya Federasiyasına müəyyən əmtəə və texnologiyaların ixracına qadağa tətbiq etmək niyyətindədir.
Bu barədə Kanadanın baş naziri Castin Trüdonun mətbuat xidmətinin cümə axşamı NATO-nun Brüsseldə keçirilən sammitinin yekunlarına dair yaydığı bəyanatında deyilir.
Bundan əlavə, sənəddə bildirilir ki, Kanada Ukraynaya humanitar yardım üçün ayırdığı 100 milyon Kanada dollarının (79,5 milyon dollar) yarısını qonşu ölkələrə, o cümlədən Moldovaya, eləcə də Ümumdünya Səhiyyə Təşkilatına, BMT-nin Qaçqınlar üzrə Agentliyinə, Kanada Qırmızı Xaç Cəmiyyəti və ukraynalı qaçqınlara yerindəcə kömək edə biləcək digər təşkilatlara yönəltmək niyyətindədir. Daha 5 milyon Kanada dolları isə (təxminən 4 milyon dollar) Ukraynanın mədəni irsini qorumaq üçün YUNESKO-ya köçürüləcək.
Bəyanatda həmçinin Rusiya Federasiya Şurasının 160 üzvünün sanksiya siyahısına daxil edilməsi bir daha xatırladılır. Bunu Trüdonun özü cümə axşamı günü Brüsseldə keçirdiyi mətbuat konfransında elan edib.
Mənbə: TASS
www.102info.az
