Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən ölkəmizdə ikinci dəfə keçirilən Festival bu dəfə Salyan rayonunda marağa səbəb olub.
“Peşəni peşəkardan soruş!” devizi ilə keçirilən Festivalda Agentliyi İdarə Heyəti sədrinin müavini Ülvi Abasquliyev, Salyan Rayon İcra Hakimiyyətinin başçısı Sevindik Hətəmov, dövlət və özəl qurumların nümayəndələri, yerli ekspertlər, işəgötürənlər, tələbə və gənclər iştirak edib.Qonaqlar çıxışlarında Festivalın rayonda böyük marağa səbəb olduğunu, gəncləri yeni peşələr barədə məlumatlandırmaqda önəmli tədbirlərdən biri olduğu bildirilib.
Daha sonra təqdim olunan peşələrin stendləri ilə tanış olublar, ekspertlərlə söhbət ediblər.
Festival çərcivəsində robototexnika, proqram tərtibatçısı, data analitika, aşpaz, barista, aqronom, bərbər, mobil telefonların təmiri ustası, elektrik avadanlıqların təmiri, yardım masası, Uİ/UX dizayner, qrafik dizayner, geyim üzrə dizayner, fotoqraf/videoqraf peşələri üzrə peşəkar ekspertlər tərəfindən təqdimat və vörkşoplar keçirilir.
Qeyd edək ki, bu dəfə də ölkənin 10 rayon və şəhərində keçirilən festivalda iştirakçılar peşələr üzrə hansı bacarıqların tələb olunduğunu öyrənir, müxtəlif peşələr üzrə ekspertlərin təqdimatlarında iştirak edir və peşələrlə əyani şəkildə tanış olmaq imkan əldə edirlər.Bundan başqa festival iştirakçılarına Agentliyin Mərkəzi Karyera filialının karyera məsləhətçiləri tərəfindən peşəyönümü məsləhət xidmətlərinin göstərilməsi təmin edilir, onlara xidmətlər haqqında məlumat verilir.
Növbəti festival 9 noyabr 2023-cü il tarixində Ordubad rayonunda keçiriləcək.
