28 May Azərbaycan xalqının tarixində dönüş nöqtəsi, milli şüurun oyanışını və dövlətçilik iradəsinin təcəssümünü göstərən müqəddəs bir gündür. 1918-ci ildə məhz bu tarixdə Azərbaycan Xalq Cümhuriyyəti elan edilərək, əsrlərlə davam edən azadlıq arzusu real siyasi quruluşa çevrildi. Məhz həmin gün xalqımız tarix səhnəsində müstəqil dövlət quran və onu idarə etməyə qadir bir xalq kimi özünü təsdiqlədi.
Azərbaycan Xalq Cümhuriyyəti, cəmi 23 ay yaşasa da, ölkəmiz üçün böyük mənəvi-siyasi irs qoyub getdi. Demokratik dəyərlərin – parlament idarəetməsi, siyasi plüralizm, vətəndaş hüquqlarının tanınması və qadınlara səsvermə hüququnun verilməsi – tətbiqi Şərqdə bir ilk idi. Bu, eyni zamanda o dövrdə Azərbaycan xalqının nə qədər qabaqcıl və mütərəqqi baxışlara malik olduğunu göstərirdi.
Lakin bu azadlıq uzunömürlü olmadı. 1920-ci ildə sovet işğalı ilə Azərbaycanın müstəqilliyinə son qoyuldu. Lakin 28 May ideyası, azadlıq ruhu xalqın yaddaşında yaşamaqda davam etdi və nəhayət, 1991-ci ildə bu ideya reallığa çevrildi. Azərbaycan yenidən müstəqil oldu və tariximizdə yeni inkişaf mərhələsinin əsası qoyuldu.
1991-ci ilin müstəqillik bərpası heç də asan baş vermədi. İlk illərdə yaşanan xaos, siyasi qarşıdurmalar və təhlükəli geosiyasi təzyiqlər Azərbaycanı ciddi sınaqlarla üz-üzə qoydu. Məhz bu mürəkkəb tarixi məqamda xalqın tələbi ilə Ümummilli Lider Heydər Əliyevin yenidən hakimiyyətə qayıdışı Azərbaycan dövlətçiliyini xilas etdi. Onun rəhbərliyi ilə ölkədə sabitlik bərqərar edildi, hüquqi dövlət quruculuğuna başlanıldı, beynəlxalq münasibətlər sisteminə inteqrasiya sürətləndi və milli iqtisadiyyatın əsası qoyuldu. Bu mərhələ tariximizin yeni inkişaf dövrü kimi qiymətləndirilməlidir. Ulu Öndər Heydər Əliyev həm də 28 May ideyalarını müasir dövrə uyğunlaşdıraraq Azərbaycan dövlətçiliyinin ideoloji əsaslarını müəyyənləşdirdi.
Azərbaycan Respublikasının Prezidenti İlham Əliyevin liderliyi dövründə ölkəmiz regional gücə çevrildi. “Güclü dövlət – güclü xalq” strategiyası əsasında həyata keçirilən siyasət Azərbaycanın hərtərəfli inkişafını təmin etdi. Prezident İlham Əliyev müstəqilliyimizin davamlılığı və tarixi irsin qorunmasının vacibliyini xüsusi vurğulayaraq bildirmişdir: “Müstəqilliyimizin qorunması, möhkəmlənməsi ən vacib məsələlərdən biridir. 1918-ci ildə qurulmuş Azərbaycan Xalq Cümhuriyyəti cəmi 23 ay yaşadı. Müstəqil Azərbaycan Azərbaycan Xalq Cümhuriyyətinin varisidir və onların niyyətlərini biz həyatda təmin etdik, həyata keçirdik. Əminəm ki, müstəqillik yolunda bizim inkişafımız davamlı olacaq, uğurlu olacaq və Azərbaycanın dövlət müstəqilliyi əbədi olacaq!”
Bu mühüm fikirlər bir daha sübut edir ki, bu gün Azərbaycan dövləti təkcə Cümhuriyyətin hüquqi varisi deyil, həm də onun ideyalarının real daşıyıcısı və gerçəkləşdiricisidir. 2020-ci ildə Vətən müharibəsində qazanılan Qələbə, 2023-cü ildə ölkənin tam ərazi suverenliyinin təmin olunması müstəqilliyimizin real məzmunla doldurulduğunu təsdiqlədi.
Bu mərhələ tariximizin növbəti mühüm inkişaf dövrünün başlanğıcı oldu. Artıq dövlət müstəqilliyi yalnız hüquqi status deyil, hərbi, siyasi və iqtisadi reallıqdır. Tariximizin hazırkı inkişaf mərhələsi əvvəlki dövrlərdən həm məzmun, həm də mahiyyət baxımından fərqlənir. Bu mərhələnin əsas xüsusiyyəti Azərbaycanın tam suverenliyinin təmin olunması və milli birliyin daha da möhkəmlənməsidir. Ərazi bütövlüyünün bərpası ilə Azərbaycan dövlətçiliyi tam mənada tamamlanaraq real gücə çevrilmişdir. Dövlət idarəçiliyi Prezident İlham Əliyevin rəhbərliyi ilə strateji hədəflərə əsaslanan, mərkəzləşdirilmiş və effektiv fəaliyyət mexanizminə malik bir model üzərində qurulmuşdur. Eyni zamanda ölkədə sürətli texnoloji inkişaf, rəqəmsallaşma, yaşıl enerji siyasəti və sənaye infrastrukturunun genişləndirilməsi istiqamətində mühüm addımlar atılır. Bütün bunlarla yanaşı, Qarabağ və Şərqi Zəngəzurda aparılan genişmiqyaslı bərpa və quruculuq işləri, Böyük Qayıdış prosesinin reallığa çevrilməsi Azərbaycanın milli potensialını və gələcəyə inamını parlaq şəkildə əks etdirir. Bu gün müstəqil Azərbaycan artıq yeni keyfiyyət mərhələsinə qədəm qoyaraq, həm regional, həm də qlobal miqyasda söz və nüfuz sahibi olan bir dövlətə çevrilmişdir.
Bir sözlə, 28 May – yalnız tarixi bir gün deyil, həm də milli kimliyin, müstəqillik düşüncəsinin və gələcəyə inamın simvoludur. Bu gün biz artıq tariximizin yeni inkişaf mərhələsində yaşayırıq – daha güclü, daha dayanıqlı və daha strateji düşünən bir Azərbaycanla. Bu mərhələnin əsas məqsədi Azərbaycanı regionun lider dövləti kimi daha da möhkəmləndirmək, xalqımızın rifahını artırmaq və gələcək nəsillərə qürur duyacaqları bir vətən miras qoymaqdır.
Tural Tarverdiyev,
Salyan rayon Kürqaraqaşlı kənd inzibati
ərazi dairəsi üzrə nümayəndənin müavini, YAP fəalı
