Müasir Azərbaycanın qazandığı siyasi, iqtisadi və diplomatik uğurlar Prezident İlham Əliyevin liderlik keyfiyyətləri, strateji düşüncəsi və qətiyyətli siyasi iradəsi ilə birbaşa bağlıdır. Dövlət başçısı kimi fəaliyyətə başladığı ilk gündən cənab İlham Əliyev qarşıya qoyduğu əsas məqsədi aydın şəkildə müəyyən etmişdir: müstəqil, güclü, iqtisadi baxımdan dayanıqlı və beynəlxalq arenada söz sahibi olan Azərbaycan dövləti qurmaq. Bu məqsəd uğrunda həyata keçirilən siyasət ardıcıllığı, praqmatik yanaşması və milli maraqlara əsaslanması ilə seçilir.
Prezident İlham Əliyev lider kimi yalnız mövcud vəziyyəti idarə edən deyil, gələcəyi qabaqcadan görən və onu planlı şəkildə formalaşdıran dövlət xadimidir. Onun rəhbərliyi ilə qəbul edilən qərarlar qısa müddətli nəticələrə deyil, uzunmüddətli strateji hədəflərə hesablanmışdır. Məhz bu yanaşma sayəsində Azərbaycan son illər ərzində daxili sabitliyini möhkəmləndirmiş, iqtisadi müstəqilliyini təmin etmiş və beynəlxalq münasibətlər sistemində etibarlı tərəfdaş kimi mövqeyini gücləndirmişdir.
Prezident İlham Əliyevin uğurlu liderliyinin əsas nəticələrindən biri ölkədə aparılan dərin və düşünülmüş islahatlardır. Bu islahatlar iqtisadiyyatın strukturunun yenilənməsinə, idarəetmə mexanizmlərinin müasirləşdirilməsinə və dövlət resurslarının səmərəli istifadəsinə yönəlmişdir. Dövlət başçısının qətiyyətli siyasi iradəsi nəticəsində Azərbaycan bu gün gələcəyə böyük ümidlərlə və nikbin baxışla baxan ölkəyə çevrilmişdir. Bu nikbinliyin arxasında isə güclü iqtisadi baza, maliyyə sabitliyi və milli maraqlara söykənən siyasi xətt dayanır.
Prezident İlham Əliyevin iqtisadi siyasəti Azərbaycanın real iqtisadi müstəqilliyini təmin etmişdir. Xarici borclardan asılı olmayan büdcə modeli, strateji valyuta ehtiyatlarının formalaşdırılması, qeyri-neft sektorunun inkişafı və sosial öhdəliklərin vaxtında icrası ölkənin iqtisadi gücünü daha da möhkəmləndirmişdir. Bu iqtisadi güc isə dövlətin beynəlxalq arenada müstəqil və prinsipial mövqe tutmasına imkan yaradır.
Prezident İlham Əliyevin lider kimi uzaqgörənliyini nümayiş etdirən ən mühüm təşəbbüslərdən biri “Cənub Qaz Dəhlizi” layihəsidir. Bu nəhəng enerji layihəsi məhz dövlət başçısının siyasi iradəsi və ardıcıl diplomatik fəaliyyəti nəticəsində uğurla reallaşdırılmışdır. “Cənub Qaz Dəhlizi” Azərbaycanın beynəlxalq nüfuzunu əhəmiyyətli dərəcədə artırmış, ölkəmizi Avropanın enerji təhlükəsizliyində etibarlı tərəfdaşa çevirmişdir. Bu layihə Prezident İlham Əliyevin enerji diplomatiyasının uğurlu nəticəsi olmaqla yanaşı, Azərbaycanın geosiyasi mövqelərini də möhkəmləndirmişdir.
Prezident İlham Əliyevin xarici siyasət strategiyası onun liderlik xüsusiyyətlərini ən aydın şəkildə ortaya qoyan sahələrdən biridir. Dövlət başçısının vurğuladığı kimi, Azərbaycanın xarici siyasəti daxili siyasətin məntiqi davamıdır və milli maraqlar üzərində qurulub. İlham Əliyevin rəhbərliyi ilə Azərbaycan heç bir güc mərkəzindən asılı olmadan, bərabərhüquqlu və qarşılıqlı hörmət prinsiplərinə əsaslanan münasibətlər sistemi formalaşdırmışdır. Bu siyasət ölkəmizi mümkün xarici risklərdən qorumaqla yanaşı, beynəlxalq etimadı da gücləndirmişdir.
Prezident İlham Əliyevin rəhbərliyi altında Azərbaycan həm qonşu dövlətlərlə, həm İslam Əməkdaşlıq Təşkilatına üzv ölkələrlə, həm də Avropa dövlətləri ilə konstruktiv və işgüzar əlaqələr qurmağa nail olmuşdur. Bu münasibətlər balanslaşdırılmış deyil, məhz milli maraqların diktə etdiyi prinsipial siyasətin nəticəsidir. Dövlət başçısı bu münasibətlər sistemində Azərbaycanın suverenliyini və müstəqil qərarvermə hüququnu daim əsas prioritet kimi qoruyur.
Eyni zamanda Prezident İlham Əliyev dünyada sülhün, dialoqun və konstruktiv əməkdaşlığın təşviqinə yönəlmiş beynəlxalq təşəbbüsləri ilə də seçilir. Onun irəli sürdüyü regional və qlobal əməkdaşlıq formatları Azərbaycanın sülhsevər, məsuliyyətli və etibarlı aktor kimi tanınmasına mühüm töhfə verir. Bu təşəbbüslər Prezident İlham Əliyevin yalnız milli maraqları deyil, qlobal sabitliyi də nəzərə alan lider olduğunu təsdiqləyir.
Bəli, qətiyyətlə demək olar ki, Prezident İlham Əliyevin lider kimi fəaliyyəti Azərbaycanın bu gün gəlib çatdığı uğurların əsas mənbəyidir. Düşünülmüş islahatlar, iqtisadi müstəqillik, enerji diplomatiyası və milli maraqlara əsaslanan xarici siyasət vahid strateji xəttin tərkib hissələridir. Bu xətt Azərbaycanı regional gücdən qlobal miqyasda söz sahibi olan dövlətə çevirmişdir. Məhz Prezident İlham Əliyevin uzaqgörən və qətiyyətli siyasəti sayəsində Azərbaycan bu gün gələcəyə böyük inam və nikbinliklə baxır.
Allahverdi Piriyev
Salyan rayon Ziyalılar birliyinin sədri, Əməkdar müəllim, YAP fəalı
