Füzulinin azad edilməsinin strateji əhəmiyyəti, əməliyyatın mürəkkəbliyi və önəmi barədə çox danışılıb. Füzuli nəzarətimizə keçəndən sonra artıq Şuşa istiqamətinə getmək üçün daha geniş imkanlar açıldı. Ermənistan tərəfi burada çox güclü istehkamlar qurmuşdu. Otuz il ərzində düşmən burada möhkəmlənirdi və bu istehkamları yarmaq, keçmək xalqımızın böyük qəhrəmanlığını, fədakarlığını bir daha göstərmişdir.
Qeyd edək ki, Füzuli şəhəri və rayonun böyük hissəsi 23 avqust 1993-cü il tarixində erməni silahlı qüvvələri tərəfindən işğal olunmuşdur. Ermənistanın silahlı qüvvələri ilə mübarizədə rayon sakinlərindən 400 nəfərədək müharibə əlili, 663 nəfər şəhid olmuşdur, 181 nəfər əsir və itkin düşmüşdür. 5 yanvar 1994-cü ildə Azərbaycan Respublikası Silahlı Qüvvələrinin hücumu nəticəsində Füzuli rayonun 22 yaşayış məntəqəsi işğaldan azad olunmuşdur. O zaman işğaldan azad olunmuş ərazilərdə hazırda rayon əhalisinin 50%-ə qədəri yaşayırdı.
Torpaqlarımızın işğal altında olduğu illərdə insanlar heç vaxt ümidlərini itirmədi, doğma yurdun azad olunacağı ilə bağlı inam gündən-günə böyüdü. Onların inamını daha da gücləndirən isə Prezident İlham Əliyevin yürütdüyü siyasət idi. Çünki bu siyasət torpaqlarımızın işğaldan azad olunacağı tarixi hər gün yaxınlaşdırırdı.
Amma hələ ki, Ermənistan sülh müqaviləsi bağlamaqdan boyun qaçırır. Azərbaycan isə bu prosesə tam hazırdı. İlham Əliyev hesab edir ki, bu məsələdə vasitəçiyə də ehtiyac yoxdur, iki ölkə məsələni həll edə bilər və bu da bölgədə uzunmüddətli sülhü təmin edər.
Dövlət başçısımız cənab İlham Əliyev Füzuli rayonunun ictimaiyyəti ilə görüşlərində həmçinin Ermənistandakı revanşistlərə də sərt xəbərdarlığını ünvanlayıb. Rəsmi İrəvan törətdiyi hərbi cinayətlərə görə məsuliyyət daşımalıdır. Ermənistan 30 ilə yaxın müddət ərzində işğal altında saxladığı Azərbaycan ərazilərində vandalizm aktı törədib, bütün maddi, mədəni, tarixi və dini abidələr məhv edilib. Erməni hərbi birləşmələrinin təxribatı nəticəsində mülki əhaliyə, dövlət əmlakına, infrastruktur obyektlərinə, habelə sahibkarlıq subyektlərinə dəyən ziyanın qiymətləndirilməsi üçün bütün lazımi tədbirlər görüləcəkdir. Dağıntı və ziyanın müəyyənləşdirilməsi üçün işçi qrup tərəfindən qiymətləndirmə işləri aparılacaqdır. Yerli və xarici ekspertlərin iştirakı ilə aparılacaq bu işlər nəticəsində erməni vandalizminə adekvat qiymət veriləcəkdir. Füzuli azad edilmiş rayonlar arasında minaların sayına görə ən çox çirkləndirilmiş rayondur – yüz mindən çox mina basdırılıb.
Biz dinc vətəndaşlarımızın başına gətirilənləri unutmamalıyıq. Tarixi olduğu kimi bilməliyik və ona obyektiv qiymət verməliyik
Yusif Əsgərzadə,
Cəlilabad şəhər sakini, Vətən müharibəsinin iştirakçısı
